ENGLISH
 
სვოპ ოპერაციები


"სვოპ" ოპერაციები არის მონეტარული პოლიტიკის ინსტუმენტი, რომლის მიზანია ბაზრისთვის ლიკვიდობის მიწოდება. 

2020 წლის აპრილიდან, ეროვნული ბანკი ლიკვიდობის მხარდაჭერას, რეფინანსირების სტანდარტულ სესხებთან ერთად, დამატებით სვოპ ოპერაციებითაც უზრუნველყოფს. აღნიშნული ინსტრუმენტი ბანკების გარდა, მიკროსაფინანსო ორგანიზაციებისათვისაც არის ხელმისაწვდომი. 
 

სვოპ ოპერაციებით ეროვნული ბანკი ეროვნული ვალუტით ერთი თვის ვადით იყიდის უცხოურ ვალუტას სპოტ კურსით, მისი ფორვარდული კურსით უკან გაყიდვის პირობით. კომერციულ ბანკებს და მიკროსაფინანსო ორგანიზაციებს ლარის ლიკვიდობა მიეწოდებათ 200-200 მლნ (ჯამში 400 მლნ) აშშ დოლარის ლიმიტის მქონე სვოპ ოპერაციებით. სვოპის მთლიანი თანხა სქემის მონაწილეთა შორის ფინანსური ინსტიტუტის საბაზრო წილის პროპორციულად განაწილდება. ამასთან, ზედმეტი კონცენტრაციის თავიდან ასაცილებლად, ერთ ორგანიზაციაზე დაწესდება მთლიანი მოცულობის 25%-მდე ლიმიტი. კომერციულ ბანკს და მიკროსაფინანსო ორგანიზაციას აქვთ შესაძლებლობა ყოველთვიურად აითვისონ სვოპის განსხვავებული თანხები მათთვის დადგენილი ლიმიტის ფარგლებში.

ამასთანავე, ლიკვიდობის რისკის შესამცირებლად, ეროვნული ბანკი იყენებს მუდმივმოქმედი სვოპის ინსტრუმენტს, რაც ბანკებს, საჭიროების შემთხვევაში, საშუალებას აძლევს დამატებით მიიღონ ლარის ლიკვიდობა საჯარიმო საპროცენტო განაკვეთით. მუდმივმოქმედი სვაპის ინსტრუმენტი ბანკებსა და მიკროსაფინანსო ორგანიზაციებს აძლევს საშუალებას ლარის ლიკვიდობზე გაზრდილი მოთხოვნა დამატებითი რისკების აღების გარეშე დააკმაყოფილონ. 

სვოპის ფორვარდული კურსის დათვლა ეყრდნობა ერთთვიანი TIBR1M-ის ლარის საპროცენტო განაკვეთებს. ხოლო მუდმივმოქმედი სვოპის შემთხვევაში, სესხის საპროცენტო განაკვეთის განსაზღვრისას ასევე ემატება ეროვნული ბანკის ერთდღიანი სესხის სპრედი პოლიტიკის განაკვეთთან (ამ ეტაპზე 0.75%).

 
 
Copyright © 2020 National Bank Of Georgia   Created by: Pro-Service