ENGLISH
 

ანგარიშსწორება და საკასო ოპერაციები

რა არის IBAN?
IBAN (International Bank Account Number) არის საერთაშორისო სტანდარტის შესაბამისად წარმოდგენილი საბანკო ანგარიში. მისი გამოყენება ამცირებს ანგარიშის ნომრის არასწორად მითითების შესაძლებლობას, ვინაიდან იგი შეიცავს საკონტროლო რიცხვს, რომელიც დამოკიდებულია ანგარიშის სხვა სიმბოლოებზე. გარდა ამისა, IBAN სისტემა არის უფრო სწრაფი, ავტომატიზირებული და ამცირებს უარყოფისა და დაგვიანების ალბათობას. IBAN სტანდარტის გამოყენებისას, გადარიცხვის განსახორციელებლად საკმარისია მხოლოდ IBAN ანგარიშის ნომრის მითითება, რომლის საშუალებითაც მოხდება ბანკისა და კლიენტის იდენტიფიცირება.

ეროვნული ბანკისა და კომერციული ბანკების შეთანხმების საფუძველზე მიღებულ იქნა გადაწყვეტილება აღნიშნული სტანდარტის საქართველოში შემოღების შესახებ. გაფორმდა მემორანდუმი, რომელიც ითვალისწინებს მხარეების საბანკო ანგარიშების გახსნას ახალ IBAN ფორმატში 2010 წლის 3 მაისიდან. საქართველოში IBAN ანგარიშები წარმოდგენილი იქნება 22 სიმბოლოთი. დამატებითი ინფორმაცია IBAN-ის შესახებ იხილეთ საქართველოს ეროვნული ბანკის ვებ-გვერდზე.

რატომ არ არის ჩართული საქართველო PayPal - ში?
Paypal წარმოადგენს ელექტრონულ ბიზნესში მონაწილე კერძო კომპანიას, რომელიც საშუალებას იძლევა ფულადი გადარიცხვები და ანგარიშსწორებები განხორციელდეს  ინტერნეტის საშუალებით ონლაინ რეჟიმში. Paypal არ ოპერირებს ყველა ქვეყანაში. ახალ ქვეყანაში შესვლის გადაწყვეტილებას იღებს კომპანიის ხელმძღვანელობა  კომერციული ინტერესებიდან გამომდინარე.  Paypal-ში ჩართული ქვეყნების რიცხვი იზრდება პერიოდულად, გაფართოება ხშირ შემთხვევაში ხდება არა ცალკეული ქვეყნისთვის, არამედ ქვეყანათა ჯგუფისთვის. ამჟამად საქართველო არ არის აღნიშნული სერვისის მომხმარებელთა სიაში, მაგრამ მოსალოდნელია რომ კომპანიის დაფარვის სივრცის მომავალი გაფართოებისას საქართველო მოხვდეს Paypal-ში მონაწილე ქვეყანათა ჯგუფში.

რა არის RTGS?
RTGS (Real Time Gross Settlement System) ანუ რეალურ დროში ანგარიშსწორების სისტემა - ეს არის საანგარიშსწორებო სისტემა, რომლის საშუალებითაც ანგარიშსწორება და ფასიანი ქაღალდების გადაცემა ერთი ბანკიდან მეორეზე ხორციელდება რეალურ დროში „გროს“ პრინციპით. „გროს“ პრინციპი ნიშნავს, რომ ფულადი სახსრების გადარიცხვა ხდება თითოეული ტრანზაქციისთვის ინდივიდუალურად, ცალკეული საგადამხდელო საბუთის საფუძველზე და ადგილი არ აქვს ნეტირებას (ურთიერთგაქვითვა).

ლარის გადარიცხვა ბანკიდან ბანკში უმეტეს შემთხვევაში შესაძლებელია მყისიერად განხორციელდეს, ან ყველაზე გვიან მეორე სამუშაო დღეს.

სად შეიძლება უცხოური ვალუტების კონვერტაცია?
უცხოური ვალუტის კონვერტაცია ხორციელდება როგორც ვალუტის გადამცვლელი პუნქტების საშუალებით, ასევე ბანკებსა და მიკროსაფინანსო დაწესებულებებში. გასათვალისწინებელია, რომ უცხოური ვალუტის კონვერტაციას აწარმოებს ყველა მოქმედი ვალუტის გადამცვლელი პუნქტი, მაშინ როდესაც ზოგიერთი ფინანსური დაწესებულება შეიძლება არ სთავაზობდეს მომხმარებლებს აღნიშნულ მომსახურებას. დაწესებულების მიერ კონკრეტული ვალუტის ყიდვა-გაყიდვის კურსის დადგენა ხდება მასზე მოთხოვნა-მიწოდების და ქვეყნის სავალუტო ბაზარზე ჩამოყალიბებული კურსის გათვალისწინებით. როგორც წესი შიდა ბაზარზე, ლარის კურსი ყალიბდება აშშ დოლარის მიმართ, ხოლო სხვა ვალუტებისათვის გამოიყენება მსოფლიო ბაზარზე არსებული კროს-კურსები. ეროვნული ბანკი არ აკონტროლებს ვალუტის გადამცვლელი პუნქტების მიერ დადგენილ სავალუტო კურსებს.

შეიძლება თუ არა დაზიანებული ფულის (ლარის) გამოცვლა?
ლარის დაზიანებული ბანკნოტებისა და მონეტების გამოცვლა შეუფერხებლად ხორციელდება როგორც საქართველოს ეროვნული ბანკის ისე კომერციული ბანკების მიერ (გარდა ყალბი ან არგადახდითი ლარის ბანკნოტების და მონეტებისა). ყალბი ფულის ნიშნებს განეკუთვნება თაღლითური და არაკანონიერი გზით დამზადებული ბანკნოტები და მონეტები, აგრეთვე ფალსიფიცირებული ფულის ნიშნები, რომლებზედაც შეინიშნება ნომინალური გადაკეთების კვალი. დაზიანებული ფულის ნიშანი მიიჩნევა გადასახდელად უვარგისად - როდესაც შეუძლებელია ნომინალის იდენტიფიცირება, შემადგენელი ნაწილები არ მიეკუთვნებიან ერთიდაიგივე ბანკნოტს და არ არის წარმოდგენილი ორიგინალი ბანკნოტის ზომის 50%-ზე მეტი.

ფიზიკური და იურიდიული პირებისაგან გამოცვლის მიზნით დაზიანებული ფულის ნიშნების მიღებისას, ვარგისი ფულის ნიშანი აუნაზღაურდება შემომტანს, გადასახდელად უვარგისი ფულის ნიშანი მოთხოვნის შემთხვევაში უბრუნდება მას, ხოლო ყალბი ფული შესაბამისი ცნობის საფუძველზე ჩამოერთმევა მფლობელს.

სად შეიძლება ოქროს საინვესტიციო მონეტების შეძენა?
პირველი ქართული საინვესტიციო ოქროს მონეტები „ოქროს საწმისის“ გამოსახულებით დამზადებულია ავსტრიის ზარაფხანაში. გამოშვებულია ექვსი სხვადასხვა ზომისა და წონის საინვესტიციო მონეტა. ყველაზე მცირე იწონის 3,1 გრამს, ყველაზე დიდი კი 311 გრამს.

ოქროს საინვესტიციო მონეტების შეძენა შესაძლებელია საქართველოს ეროვნული ბანკის ფულის მუზეუმში. ოქროს საინვესტიციო მონეტების ფასები ქვეყნდება საქართველოს ეროვნული ბანკის ვებგვერდზე.

სად შეიძლება მოლარეთა კურსების გავლა?
მოლარის კურსების გავლა, შესაბამისი განცხადების საფუძველზე (იხ. ბმული ფაილი ) შესაძლებელია საქართველოს ეროვნულ ბანკში.

ხელმოწერილი განცხადების ფორმა  ბარდება საქართველოს ეროვნული ბანკის კანცელარიაში, რის შემდეგაც, ეროვნული ბანკის მხრიდან მოხდება დაკავშირება და სწავლების მსურველს ეცნობება კურსების ჩატარების ზუსტი დრო. სწავლების კურსი ერთდღიანია მოქალაქეებისათვის, ხოლო ვალუტის გადამცვლელი პუნქტებისათვის (ფიზიკური და იურიდიული პირები) ორდღიანი.

 

<< უკან

 
 
Copyright © 2018 National Bank Of Georgia   Created by: Pro-Service