ENGLISH
 

16.07.2008   ბეჭდვა
საქართველოში საკრედიტო ბარათების ოდენობა 7.9–ჯერ გაიზარდა

პლასტიკური ბარათების ბაზარი კვლავ დინამიკურად ვითარდება. საქართველოში არსებული კომერციული ბანკებიდან პლასტიკური ბარათების ემისიას 13 ბანკი ახორციელებს. ემიტირებული და მიმოქცევაში არსებული საბანკო პლასტიკური ბარათების რაოდენობამ მიმდინარე წლის პირველი ივლისისათვის 2.9 მლნ შეადგინა, რაც 1.9-ჯერ მეტია 2007 წლის ანალოგიური თარიღისათვის არსებულ მაჩვენებელზე. აქედან, 88.6 პროცენტი სადებეტო ბარათებზე მოდის. 2007 წელს იგივე მაჩვენებელი 97.2 პროცენტის შეადგენდა. პლასტიკური ბარათების სტრუქტურის ცვლილება საკრედიტო ბარათებზე მოთხოვნის სწრაფი ზრდის შედეგია. თუ ბოლო ერთ წელიწადში მიმოქცევაში არსებული სადებეტო ბარათების რაოდენობის ზრდამ 76.1 პროცენტი შეადგინა, საკრედიტო ბარათების რაოდენობა იმავე პერიოდში 7.9-ჯერ გაიზარდა.

კვლავ შეინიშნება VISA ბარათის პოპულარობის ზრდა. იგი მიმოქცევაში არსებული ბარათების 78.2  პროცენტს შეადგენს; მას მოსდევს EURO CARD/MASTER CARD-ი 13.9 პროცენტით, ხოლო დანარჩენი 7.9 პროცენტი ადგილობრივი ბარათების წილად მოდის. აღსანიშნავია, რომ, ბოლო ერთ წელიწადში, მიმოქცევაში არსებული ბარათების მთლიან რაოდენობაში VISA ბარათების ხვედრითი წილი 10.3 პროცენტული პუნქტით გაიზარდა.

სულ უფრო იზრდება საბანკო პლასტიკური ბარათებით განხორციელებული ოპერაციების მოცულობა. მიმდინარე წლის ივნისში რეზიდენტი ემიტენტების მიერ გამოშვებული ბარათებით განხორციელდა 2.5 მლნ ოპერაცია, რომელთა საერთო მოცულობა, 2007 წლის შესაბამის პერიოდთან შედარებით, 73.2 პროცენტით გაიზარდა და 373.5 მლნ ლარი შეადგინა. ოპერაციების საერთო მოცულობის 94.9 პროცენტი რეზიდენტი ემიტენტების მიერ გამოშვებული ბარათებით ქვეყნის შიგნით (მათ შორის, ინტერნეტით) განხორციელებულ ოპერაციებზე მოდის, 5.1 პროცენტი კი ამავე ბარათებით საზღვარგარეთ განხორციელებული ოპერაციებია.

მნიშვნელოვანია, აგრეთვე პლასტიკური ბარათების მომსახურება, რომელიც ხორციელდება კომერციული ბანკების კუთვნილი ბანკომატებითა და პოსტერმინალებით. საანგარიშო თვის განმავლობაში კომერციული ბანკების კუთვნილი ბანკომატებით და პოსტერმინალებით  1038.4 ათასი ოპერაცია განხორციელდა.  ოპერაციების საერთო მოცულობამ კი 218.0  მლნ ლარი შეადგინა.  ამ  უკანასკნელიდან 87.6 პროცენტი რეზიდენტი ბანკების, 12.4 პროცენტი კი არარეზიდენტი ბანკების მიერ  ემიტირებული ბარათებით განხორციელდა.

წინამდებარე სტატისტიკური ინფორმაცია ქვეყნდება საქართველოს ეროვნული ბანკის ვებგვერდზე, სტატისტიკის რუბრიკაში.

<< უკან

 
 
Copyright © 2019 National Bank Of Georgia   Created by: Pro-Service